Në raportin preliminar për zgjedhjet e 15 korrikut në Maqedoninë e Veriut, misioni i OSBE-ODIHR përmend edhe dyshimet e shumta që ekzistojnë rreth numrit të votuesve. ODIHR në raport thekson shqetësimet e shprehura lidhur me numrin prej mbi 1 milion e 800 mijë votuesve, “Sipas ligjit, KSHZ-ja ishte fillimisht përgjegjëse për përpilimin e regjistrit të votuesve në bazë të azhurnimeve të dhëna nga Ministria e Punëve të Brendshme, Zyrën për Udhëheqje me Librat e Gjendjes Civile dhe gjykatat. Para pezullimit të procesit zgjedhor, këqyrja publike e listës së votuesve kishte përfunduar dhe kopjet e listës së votuesve u ishin dorëzuar partive politike. Megjithëse kalendari i ri zgjedhor lejoi azhurimin e regjistrit për t’i larguar personat e vdekur dhe për t’i përfshirë qytetarët që kanë mbushur 18 vjet, nuk u vendos ndonjë periudhë e këqyrjes publike për këtë nëngrup të ri. Më 1 korrik, lista e votuesve u mbyll dhe ajo përfshinte 1.814.263 qytetarë, nga të cilët 83.054 janë paraqitur se banojnë përkohësisht jashtë vendit.
Shumë bashkëbisedues të MPVZ-së së ODIHR-it ngritën shqetësime në lidhje me saktësinë e listës së votuesve, përgjithësisht duke pohuar se numri i votuesve të regjistruar tejkalon numrin e qytetarëve me vendbanim të përhershëm, duke e rritur kështu shkallën e abstenimit. Çështjet shumëvjeçare strukturore, si mungesa e standardizimit të të dhënave të adresave dhe harmonizimi në mes institucioneve, që janë identifikuar në raportet e mëparshme të ODIHR-it, mbesin të patrajtuara. Procesi i regjistrimit të votuesve u ndikua në mënyrë plotësuese nga kapaciteti i kufizuar i TI-së i KSHZ-së, dhe për këtë arsye nuk është kryer asnjë kontroll gjithëpërfshirës i cilësisë së regjistrit të votuesve”, thuhet në raportin preliminar të shpallur dje. Aty theksohet edhe se KSHZ-ja regjistroi 759 votues për votimin e parakohshëm më 13 korrik, të cilët ishin pozitivë ndaj KOVID-19 ose ishin në vetizolim, dhe 10.822 nga 9,499 kërkesa për votim mobil më 14 korrik në shtëpi ose në spitale, institucione të kujdesit jashtë familjes dhe në burgje.
No comments: