Kur nuk ishin varrosur ende të rënët në konfliktin e Kumanovës një gazetë në Kosovë nxorri lajmin se i njëjti grup kishte planifikuar sulme edhe në territorin e Kosovës, më saktë në Burgun e sigurisë së lartë të Gërdofcit në Podujevë. Sipas gazetës, që citonte burime qeveritare, ata do të mundësonin lirimin e disa të burgosurve të rrezikshëm, të cilët më pas do të shkonin në Siri.
Pra me pak fjalë, po kërkohet ti jepen ngyrime xhihadiste të gjithë ngjarjeve të 9 dhe 10 majit në "Lagjen e Trimave" dhe atë çfarë ka pasuar pas saj. Një tentativë e shëmtuar kjo pasi në asnjë moment nuk është parë diçka e tillë te personat e përfshirë në "Grupin e Kumanovës". Në të gjitha deklaratat publike dhe jopublike të tyre në asnjë moment nuk ka patur ngjyrime me karakter fetar, por vetëm atdhetar.
Është e vërtetë që 10 personat e vrarë në këtë ngjarje i përkisnin fesë islame, ashtu si pjesa dërrmuese e shqiptarëve, por kjo nuk do të thotë se duhet lidhur patjetër me xhihadin.
Të shkelësh ndjenjat e miliona shqiptarëve për hir të reklamimit "bukur" para perëndimorëve jo vetëm që është e shëmtuar, por shkel rëndë ndjenjat e familjarëve të të rënëve, familjarëve të personave që kanë djemtë e tyre në burgjet e Maqedonisë si dhe shkel idealet kombëtare.
Do të jetë hetimi ndërkombëtar ai që do të zbardhë të vërtetën e "Kumanovës" ndaj deri atëherë le të jemi të duruar dhe të mos bëjmë deklarata boshe dhe të pahijshme. /albeu.com/
No comments: