Vajgël: Maqedonia mund ta humbë rekomandimin!

Maqedonia mund ta humbë rekomandimin për anëtarësim në Bashkimin Evropian për shkak të skandaleve të përgjimeve që po publikohen nga opozita. 

Paralajmërimin e ka theksuar raportuesi për Maqedoninë në Parlamentin Evropian, Ivo Vajgl, gjatë një deklarate për Tellma. 

Diplomati ka thënë se në qarqet politike të BE-së është rritur dyshimi se vendi mund të përmbushë kriteret e një vendi demokratik të cilat është zotuar se do t’i realizojë. 

Vajgl ka thënë se BE nuk mund të imponojë zgjidhje për problemet e krijuara në vend, ndërsa kjo do të arrihej me anë të bisedimeve konstruktive ndërmjet partive politike. 

Vajgl, i cili pritet të jetë njëri prej lehtësuesve të dialogut politik, ka theksuar se në politikë gjithnjë duhet besuar se kompromisi dhe zgjidhja është e mundshme.