Oliver Schmitt, profesor i Historisë së Evropës Juglindore në Universitetin e Vjenës, si dhe anëtar i Jashtëm i Akademisë së Shkencave dhe Arteve të Kosovës ka thënë se osmanët nuk i kanë çliruar shqiptarët. Kjo deklaratë vjen pasi ditë më parë myftiu i Kosovës, Naim Tërnava osmanët i konsideroi, çlirues të shqiptarëve. “Nuk do të thosha që osmanët paskan çliruar shqiptarët, çliruar nga kush, kush okupoi. Sepse shqiptarët në mesjetë ishin pjesë e botës politike e kulturore ballkanike dhe nuk kishin nevojë për çlirim”, u shpreh Schmitt. Schmitt është profesor i historisë së Evropës Juglindore në Universitetin e Vjenës. Ndryshe, Oliver Schmitt një ditë më parë edhe zyrtarisht u shpall anëtar i jashtëm i Akademisë së Shkencave dhe Arteve të Kosovës. Këtë nder ai vendosi që ta shpaguajë përmes një bashkëpunimi që Akademia e Kosovës pritet ta ketë me Akademinë e Shkencave të Austrisë. Në një bisedë për Klan Kosovën, ai e përmendi edhe një figurë të rëndësishme historike të Kosovës, Hasan Prishtinën, i cili sipas tij meriton të përfshihet në historinë evropiane, transmeton Telegrafi.
No comments: